My Heart Was Ance As Blithe And Free

by Robert Burns

I.

My heart was ance as blithe and free
As simmer days were lang,
But a bonnie, westlin' weaver lad
Has gart me change my sang.

Chorus:
To the weavers gin ye go, fair maids,
To the weavers gin ye go;
I rede you right gang ne'er at night,
To the weavers gin ye go.

II.

My mither sent me to the town,
To warp a plaiden wab;
But the weary, weary warpin' o 't
Has gart me sigh and sab.

Chorus

III.

A bonnie, westlin' weaver lad
Sat working at his loom;
He took my heart as wi' a net,
In every knot and thrum.

Chorus

IV.

I sat beside my warpin-wheel,
And aye I ca'd it roun';
But every shot and every knock,
My heart it gae a stoun.

Chorus

V.

The moon was sinking in the west
Wi' visage pale and wan,
As my bonnie westlin' weaver lad
Convoy'd me thro' the glen.

Chorus

VI.

But what was said, or what was done,
Shame fa' me gin I tell;
But oh! I fear the kintra soon
Will ken as weel's mysel'.

Chorus

Notes to the poem:

The chorus of this song is taken from a very old ditty.
Tune: "To the weavers gin ye go."